ليه الميكانيكي بيلغي ثرموستات الكوعه أو بلف الحراره ؟
طب ايه هي وظيفه و أهميه ثرموستات الكوعه ؟
دا اللي هنعرفه النهارده مع بعض ان شاء الله
في البدايه لو مبتحبش القراءه أو بتزهق بسرعه فدا فيديو للمهندس باسم البحقيري بيشرح فيه وظيفه وأهميه ثرموستات الكوعه أو بلف الحراره وهل نلغيها ولا نسيبها راكبه في العربيه في 4 دقايق هيفهمك الموضوع كله و لو بتحب تقرأ فشرح الموضوع بالتفصيل تحت الفيديو ..يلا بينا
الموضوع ببساطه ان درجه الحراره بداخل موتور عربيتك داخل غرفه الأحتراق بتعدي 1000 درجه مئويه والحراره دي بتتنقل لأجزاء الموتور المختلفه فبالتالي بنحتاج اننا نبرد الأجزاء دي
عشان كدا بنستخدم سائل التبريد اللي بيمشي جوا الموتور ياخد الحراره من الموتور ويروح للردياتير عشان يتبرد عن طريق التبادل الحراري مع الهوا في الردياتير و يرجع تاني يبرد الموتور و هكذا
ولازم نعرف الأول ان موتور العربيه ليه درجه حراره تشغيل مثاليه يعني درجه الحراره اللي الموتور عندها بيعطي أفضل أداء و اللي بتتراوح بين 82 و 98 درجه مئويه علي حسب الشركه المصنعه
ودي بقي وظيفه ثرموستات الكوعه اللي هي عباره عن بلف بين الموتور و الردياتير في دوره التبريد وظيفته انه يكون مقفول لو درجه حراره موتور العربيه أقل من المدي بتاع درجه حراره التشغيل المثاليه عشان يخلي الموتور محتفظ بدرجه حرارته ودا بيحصل في الصباح الباكر وفي الأجواء البارده ولما درجه حراره سائل التبريد بتزيد بحيث انها تبقي أكبر من درجه الحراره المثاليه بيفتح ثرموستات الكوعه بحيث يسمح لسائل التبريد انه يروح يتبرد عشان درجه حراره الموتور مترتفعش و متسببش مشاكل زي تلف وش السلندر
يعني مثلا لو ثرموستات الكوعه عندنا مكتوب عليه 97-82 معناها انه بيفتح تدريجيا عند درجه حراره 97 ويقفل تدريجيا عند درجه حراره 82
طب ليه بقي الميكانيكي بيلغي ثرموستات الكوعه ؟
الفكره كلها انك بتروح للميكانيكي بتشتكي من سخونه العربيه وطبعا سخونه العربيه ليها أسباب كتير فالميكانيكي ساعات بيفشل انه يلاقي سبب السخونه أو بيستسهل فبيلغي ثرموستات الكوعه ويسيب دوره التبريد شغاله عمال علي بطال ودا في الغالب بينعكس علي مؤشر الحراره في عربيتك وبتلاقي الحراره نزلت فبتفرح وتفتكر ان المشكله اتحلت و متعرفش انك ابتديت المشاكل
نيجي بقي لمشاكل الغاء ثرموستات الكوعه :
1- درجه حراره موتور عربيتك هتقل عن درجه حراره التشغيل المثاليه اللي اتكلمنا عنها فوق ودا هيقلل اداء موتور العربيه
2- الزيت المستخدم لتزييت الموتور بيكون ليه لزوجه معينه لتحقيق افضل اداء .. اللزوجه دي بتتحقق فقط عند درجه حراره التشغيل المثاليه فلما بتقل درجه الحراره عن المطلوب كدا الزيت مش هيقوم بوظيفته بشكل جيد ودا هيؤدي الي تلف اجزاء الموتور المختلفه نتيجه الاحتكاك
3- استهلاك البنزين هيزيد عشان كنترول العربيه بيكون مسجل ان درجه الحراره اقل من درجه الحراره اللي المفروض بيضخ اقل نسبه بنزين للحصول علي افضل اداء
طب تعرف ازاي ان ثرموستات الكوعه ملغي في عربيتك ؟
اول طريقه انك علي الطرق السريعه هتلاقي مؤشر الحراره بيقل بشكل ملحوظ و الحراره هتبقي منخفضه عن الطبيعي
تاني طريقه افتح كبوت عربيتك الصبح بعد متدورها بدقيقتين وتمسك الخرطوم اللي واصل بين الموتور الي الردياتير اضغط علي الخرطوم دا لو السائل اللي جواه بارد دا معناه ان مفيش حركه لسائل التبريد من الموتور للردياتير كدا يبقي ثرموستات الكوعه راكبه
و بالمناسبه ثرموستات الكوعه لما بيبقي ملغي البلف من جوا اللي بيبقي ملغي انما المنظر من برا مبيتغيرش
تالت طريقه تعرف بيها ان ثرموستات الكوعه ملغيه ودي بتكون في العربيات الحديثه ان لمبه الاعطال هتكون منوره
و في الاخر في نصيحه مهمه جدا وهي انك لازم تغير ثرموستات الكوعه كل 100 الف كيلومتر مثلا عشان لو ثرموستات الكوعه قفش هيخلي درجه حراره ميه التبردي جوا الموتور تعلي عشان مبتروحش تتبرد في الدرياتير ودا ممكن يؤدي الي مشاكل كتير اهمها تلف وش السلندر
افضل انواع ثرموستات الكوعه الموجوده في السوق حاليا ماركه WAHLER
وبكدا نكون فهمنا كل حاجه عن ثرموستات الكوعه .. نشكركم علي المتابعه ونتمني لكم السلامه
تابعونا علي صفحتنا علي فيسبوك
https://www.facebook.com/Elbahkery.opel/
تابعونا علي انستجرام
https://www.instagram.com/elbahkery_opel/?hl=en